ለአቶ በቴ ቅርበት ያላቸው ሌላ ጓደኛ ለቢቢሲ እንደተናገሩት ፖለቲካኛው ወደ መቂ የተጓዙት ከከተማዋ አቅራቢያ ያላቸው የፓፓያ እርሻ ለመመልከት ነበር።

አክለውም የአራት ልጆች አባት የሆኑት የአቶ በቴ መገደል ለቤተሰባቸው ከተነገረ በኋላ የቤተሰብ አባላት ግድያው ወደተፈጸመባት መቂ ከተማ ዛሬ ጠዋት አቅንተዋል ብለዋል።

አቶ በቴ በፖለቲካ ተሳትፏቸው ምክንያት በተደጋጋሚ ለእስር ሲዳረጉ የቆዩ ፖለቲከኛ ሲሆኑ: ከጥቂት ሳምንታት በፊትም ከአንድ ፈረንሳይዊ ጋዜጠኛ ጋር በአዲስ አበባ በቁጥጥር ስር ውለው ነበር።

አቶ በቴ ኡርጌሳ ሐሙስ የካቲት 14/2016 ዓ.ም. ከፈረንሳዊው ጋዜጠኛ አንቷን ጋሊንዶ ጋር በአዲስ አበባ ስካይ ላይት ሆቴል እየተነጋገሩ ሳለ በቁጥጥር ስር ውለው ከሁለት ሳምንታት እስር በኋላ ተለቀዋል።

በወቅቱ መንግሥት የ“አፍሪካ ኢንተለጀንስ” ጋዜጠኛው እና የኦሮሞ ነጻነት ግንባር (ኦነግ) የፖለቲካ ኦፊሰር በቁጥጥር ስር የዋሉት “ከፋኖ እና ኦነግ ሸኔ ጋር በመተባባር ሁከት እና ብጥብጥ ለማስነሳት በመንቀሳቀሳቸው ነው” ብሎ ነበር።

በኦሮሞ ፖለቲካ ውስጥ ጉልህ እንቅስቃሴ በማድረግ የሚታወቁት እና በፓርቲያቸው ውስጥ በከፍተኛ ኃላፊነት ላይ የነበሩት አቶ በቴ ከዚህ ከቀደምም ለተደጋጋሚ እስር ሲዳረጉ ቆይተዋል።

በ2013 ዓ.ም. አጋማሽ ላይ በኦሮሚያ ክልል ቡራዩ ከተማ በቁጥጥር ስር የሚገኙ የኦነግ ከፍተኛ አመራሮችን ለመጠየቅ በሄዱበት ተይዘው ረዘም ላለ ጊዜ በእስር መቆየታቸው ይታወሳል።

አቶ በቴ በቡራዩ በእስር በነበሩበት ወቅት አያያዛቸው የሰብዓዊ መብትን ያከበረ አይደለም በማለት ለቀናት የረሃብ አድማ በማድረጋቸው ከፍተኛ የጤና መቃወስ አጋጥሟቸው ነበር።

የአቶ በቴን ግድያ በተመለከተ መቂ ከተማ ወደሚገኙ የከተማው ፖሊስ እና ባለስልጣናትን ለማነጋገር ያደረገውን ጥረት በስልክ አገልግሎት መቋረጥ ምክንያት ሊሳካ አልቻለም።

የኦሮሞ ነጻነት ግንባር ፓርቲ ኃላፊዎችንም ለማግኘት ያደረግነው ጥረት ስልክ ባለመነሳቱ ሊሰምር አልቻለም።  ዘገባው የቢቢሲ ነው፡፡